கிசான் கிரெடிட் கார்டு வாங்குவது ஈசி.. விவசாயிகளுக்கு குட் நியூஸ்!

விவசாயிகள் கடன் பெறுவதை எளிதாக்குவதற்காக கிசான் கிரெடிட் கார்டு (Kisan Credit Card) வசதி அறிமுகப்படுத்தப்பட்டுள்ளது. விவசாயிகள் கிசான் கிரெடி கார்டு பெற்று தங்களது பணத் தேவைகளை பூர்த்தி செய்துகொள்ளலாம்.
கிசான் கிரெடிட் கார்டு மூலம் விவசாயிகள் பெறும் கடன் தொகைக்கு மிக குறைவான வட்டி விகிதம் விதிக்கப்படுகிறது. இத்துடன் வட்டி மானியமும் அரசால் வழங்கப்படுகிறது.
பொதுவாக கிசான் கிரெடிட் கார்டு பெற விரும்பும் விவசாயிகள் நேரடியாக வங்கிக் கிளைக்கு சென்று உரிய ஆவணங்களை சமர்ப்பித்து விண்ணப்பிக்க வேண்டும். எனினும், வங்கிக் கிளைக்கே செல்லாமல் கிசான் கிரெடிட் கார்டுக்கு விண்ணப்பிக்கலாம் என இரண்டு வங்கிகள் அறிவித்துள்ளன.
யூனியன் பேங்க் ஆஃப் இந்தியா (Union Bank of India), பெடரல் வங்கி (Federal Bank) ஆகிய இரண்டு வங்கிகளும் முதற்கட்டமாக டிஜிட்டல் முறையில் கிசான் கிரெடிட் கார்டுகளை வழங்குவதாக அறிவித்துள்ளன. தற்போது தமிழ்நாடு, மத்தியப் பிரதேசம் ஆகிய மாநிலங்களில் மட்டுமே இத்திட்டம் அமல்படுத்தப்பட்டுள்ளது.
இத்திட்டத்தின் கீழ், விவசாயிகளின் ஆவணங்களை வங்கிக் கிளைகளில் சரிபார்ப்பது போன்ற பேப்பர் வேலைகளே கிடையாது. முழுக்க முழுக்க டிஜிட்டல் முறையில் கிசான் கிரெடிட் கார்டு வழங்கப்படும். ரிசர்வ் வங்கியின் முன்னெடுப்பில் இத்திட்டம் தொடங்கப்பட்டுள்ளது.
இதன்படி, யூனியன் பேங்க் ஆஃப் இந்தியா, பெடரல் வங்கி ஆகிய வங்கிகள் விவசாயிகள் ஆன்லைனிலேயே கிசான் கிரெடிட் கார்டு பெற விண்ணப்பிக்கலாம். ஆவணங்களும் ஆன்லைனிலேயே சரிபார்க்கப்படும். வங்கிக்கே செல்லாமல் உங்களுக்கு கிசான் கிரெடிட் கார்டு வழங்கப்படும்.