தீபாவளி எஃபெக்ட்.. 2500 டன் கறிக்கோழி விற்பனை!

தீபாவளி பண்டிகையை முன்னிட்டு நாமக்கல்லில் இருந்து 2,500 டன் கறிக்கோழி விற்பனை செய்யப்பட்டுள்ளது.

தமிழகத்தில் பல்லடம், நாமக்கல், ஈரோடு உள்ளிட்ட பகுதிகளில் சுமார் 25 ஆயிரம் கறிக்கோழி உற்பத்தி பண்ணைகள் உள்ளன. இங்கு தினசரி 30 லட்சம் கிலோ கறிக்கோழிகள் உற்பத்தி செய்யப்பட்டு, தமிழகம் மட்டுமின்றி ஆந்திரா, கர்நாடகா, கேரளா உள்ளிட்ட மாநிலங்களுக்கும் விற்பனைக்காக அனுப்பி வைக்கப்படுகிறது.

இந்த நிலையில் கடந்த 1ஆம் தேதி ஒரு கிலோ ரூ.88-க்கு விற்பனை செய்யப்பட்ட கறிக்கோழி, தீபாவளி பண்டிகை காரணமாக படிப்படியாக உயர்ந்து, ரூ.119-ஐ எட்டியதால் கடந்த ஆண்டை விட அதிக அளவில் கறிக்கோழி விற்பனை செய்யப்பட்டு உள்ளது. அதாவது தீபாவளி பண்டிகையை முன்னிட்டு 2 நாட்களில் மட்டும் 2,500 டன் கறிக்கோழி விற்பனையானது.

கறிக்கோழியை பொறுத்தவரை ஒரு கிலோ உற்பத்தி செய்ய ரூ.95 செலவாகிறது. தற்போது கொள்முதல் விலை, ரூ.119 என நிர்ணயம் செய்து இருந்தாலும், வியாபாரிகள் குறைவான விலைக்கு தான் கோழிகளை பிடிக்கின்றனர். அதனால் ஒரு கிலோவுக்கு ரூ.25 வரை இழப்பு ஏற்படுகிறது.

கடந்த ஆண்டு தீபாவளிக்கு 50 லட்சம் கிலோ கறிக்கோழி விற்பனை ஆனது. தற்போதைய தீபாவளி விற்பனையின் மூலம், ஒரு கிலோவுக்கு ரூ.25 வீதம் 2 நாட்களில் பண்ணையாளர்களுக்கு ரூ.60 கோடி இழப்பு ஏற்பட்டு உள்ளது.

கறிக்கோழி ஒருங்கிணைப்புக்குழு நிர்ணயம் செய்யும் கொள்முதல் விலைக்கே, வியாபாரிகள் கோழிகளை பிடித்தால், பண்ணையாளர்களுக்கு லாபம் கிடைக்கும் என கறிக்கோழி பண்ணையாளர்கள் தெரிவித்தனர். இதற்கிடையில் கறிக்கோழி விலை இன்று 14 ரூபாய் விலை குறைந்து 105 ரூபாயாக நிர்ணயம் செய்யப்பட்டுள்ளது.