பருத்தி ஏலத்தில் நல்ல லாபம்.. வியாபாரிகள் மகிழ்ச்சி!
40 லட்சத்துக்கு பருத்தி ஏலம் நடைபெற்றதால் வியாபாரிகள் மகிழ்ச்சியடைந்துள்ளனர்.
நாமக்கல் வேளாண்மை உற்பத்தியாளர்கள் கூட்டுறவு விற்பனை சங்க வளாகத்தில் பருத்தி ஏலம் நடைபெற்றது. இந்த ஏலத்துக்கு நாமக்கல், நாமகிரிப்பேட்டை, ராசிபுரம், வேலகவுண்டம்பட்டி, புதுச்சத்திரம், எருமப்பட்டி, பவித்திரம், சேந்தமங்கலம் என மாவட்டம் முழுவதும் இருந்தும், அண்டை மாவட்டங்களில் இருந்தும் விவசாயிகள் வந்திருந்தனர்.
மொத்தம் 1,650 மூட்டை பருத்தியை விற்பனைக்கு கொண்டு வந்திருந்தனர். இந்த பருத்தி மூட்டைகள் ரூ.40 லட்சத்துக்கு விற்பனையானது. இதில் ஆர்.சி.எச். ரக பருத்தி குவிண்டால் ஒன்றுக்கு ரூ.5 ஆயிரத்து 369 முதல் ரூ.9 ஆயிரத்து 609 வரையிலும், கொட்டு ரக பருத்தி குவிண்டால் ஒன்றுக்கு ரூ.2,150 முதல் ரூ.6 ஆயிரத்து 150 வரையிலும் ஏலம் போனது.
இந்த பருத்தி மூட்டைகளை திருப்பூர், திண்டுக்கல், தேனி, சேலம், கொங்கணாபுரம், கோவை, அவினாசி உள்ளிட்ட பகுதிகளில் இருந்து வந்த வியாபாரிகள் ஏலம் எடுத்து சென்றனர். சுரபி ரக பருத்தி ஏலத்துக்கு வரவில்லை என்பது குறிப்பிடத்தக்கது.
மொத்தமாக 40 லட்ச ரூபாய்க்கு மேல் பருத்தி ஏலம் நடைபெற்றதால் வியாபாரிகளும் பருத்தி விவசாயிகளும் மகிழ்ச்சியடைந்தனர். தீபாவளி சமயத்தில் நல்ல லாபம் கிடைத்திருப்பது கூடுதல் மகிழ்ச்சியை ஏற்படுத்தியுள்ளது. அடுத்த வாரம் நடைபெறும் ஏலத்திலும் விற்பனை அமோகமாக இருக்கும் என்று எதிர்பார்க்கப்படுகிறது.
